الحلم اللى مش مسموح.. كلمات علا بركات
ما بين الموت
وبين الفجر وشروق الحياة
لمحة
وقلب بيقسم المسافات
ما بين الحزن والفرحة
طريق مبدور بكل الممكنات
والمستحيل والخوف
وانا وحدى بافكر بس ف الحلم
اللى مش مسموح
واقول جايز يعاد ترتيبى
ع القايمة اللى نسيتنى
واقول يمكن يصيبنى الدور
وتتوزع غناوى الحب من تانى
على العشاق
ويطلع حظى ف الحلم اللى كان فاتنى
فى آخر دور
وغنوة عمرى تتلحن بنبض الحب
ف القلب اللى يعرفنى
ويعزفنى أمل اخضر..
وتر مشدود على خصرى
يكمل زينة المشهد
بلاش دمعك
تطبطب بيها على روحى
وتمسح كل اوجاعى
بتهرب منى احلامى وافراحى
ف لحظة ما يحاصرنى الخوف
وانا وياك....وانا وحدى
ومابيفرقش ويا الكون
فراق يقتل ف ارواحنا
ولا دمعة حنين تنزف
ولا غربة بتجرحنا
