أسمر سمار النيل، أسود سواد الليل، لكن ضحكته نهار، شديد شدة الحديد، دؤوب دؤوب دؤوب في العمل، ما شاء الله، تاتش ووود، امسكوا الخشب، امسكوا الحديد، واكبشوا الجمر والنار .

 بكري، أبو محمد، صعيدي، وآلاف آلاف صعايدة وفلاحين، من قبلي ومن بحري، شغالين، في الفجر طالعين، وفي عز الليل مبيتين، بيتر جنب ياسين، حليم وعايد وجرجس، ودانيال، جنب محمد وأحمد وإبراهيم ورمضان، شباب ورجال، من قبرص لليبيا لغيرها وغيرها كانوا متغربيين.

حاليا، بيشقوا الصحراء شق، وبيهدوا الجبال هد، طرق وكباري، سكك مترو وقطارات، ومدن، في العالمين أبراج تعلو علو النخيل، في العاصمة الإدارية، على مدد الشوف، العين ما بتجيب آخر المشاريع.

في العين السخنة، في دمياط الجديدة، والمنصورة الجديدة، وفي سيناء، وأسيوط الجديدة، ......مشاريع من شرق لغرب ومن قبلي لبحري، صعايدة وفلاحين ، مهندسين ومهندسات، شغالين.

بكري أبو محمد ، شغال مع مقاول شدَّة (سقالة) من أول لحظة لآخر لحظة، اتفرج واتمتع على الهدوء والاستمرار، تشوفه من بعيد وهو عمَّال يتحرك، بيشيل حديد، بيناول الشباب، اما بينصبوا شدَّة جديدة ، أو بيفكوا واحدة قديمة. لا توقف، لا تراجع ولا استسلام، شغالين يا بلدنا، بأجر قليل شغالين، أجورنا مِش فلوس، أجرنا على الله، وفرحتنا لما البُنا بيكمل.

كنت محتار اكتب عن مين ولا مين، شباب صنايعية زي الفل، صنايعي بيعمل شغل تحتار فيه المهندسين، كهربائي بينفذ لوحات تحكم اليكتروني فيها آلاف الوصلات، والدخلات والخارجات، فني بينفذ شبكات تكييف وتبريد مركزي، تركيب أنظمة الفاير والتكييف والتشغيل، عمال صب خرسانات، سواقين لوادر وبلدوذرات وفوركات، وأوناش معدات تقيلة وضخمة ومعقدة.

 مهندس محمد العريني، مدير السيفتي، مسئول الصحة والسلامة، بيخطب في حشد كبير من الشباب والرجال الصعايدة والبحاروة صنايعية وعمال، سواقين ومقاولين، ازاي بيسيطر على حشد كبير زي ده في ساحة مفتوحة زي دي، بيتكلم والناس لا حس ولانفس، بيكلمهم عن ازاي يتفادوا المخاطر ويحافظوا على سلامتهم. ثقافته إنجليزية، علمه في السيفتي دكتوراه، وكلامه وأسلوبه سهل بسيط مباشر حاد حازم.

المهندس نمر مدير تنفيذي، فاهم وفاكر القشاية، في لحظة تلاقيه في أبعد نقطة بين المعدات التقيلة والشمس والرمل والعفار والغبار.

مهندس أسامة فايز مدير مشروع بدرجة سياسي محنك مخضرم، أستاذ مفاوضات، لماح .

أشرف نبيل مشرف كهرباء، بيشتغل من صغره، مثقف واع بيتكلم لغات، خبير في نظم الكهرباء والشبكات، مفيش مشكلة تقف معاه، وسيد رمضان مشرف مدني، فوريجي، فوعلجي، ما بيقفش، ما بيهزرش، بيشغل الرجالة ويخليهم يطلعوا أحسن شغل. عايد صلاح كهربائي ، ياسر جرجس، كهربائ لا لا ..دول دكاترة ..أسطوات ...محمود العفريت، ليه سموه العفريت ، فعلا ممكن تلاقيه في البيزمنت ٢ وتطلع في نفس ذات الوقت تلاقيه فوق الدور السابع، أُسطى الميكانيكا والهيدروميكا والهيدروليكا.

محمد ابراهيم ، للدهانات ، صنايعي مفيش زيه، مذاكر وحافظ ، رامي عياد فورمان السباكين، مؤهل عال، وصنايعي شاطر ، وحافظ جغرافيا وتاريخ، وافي محمد فورمان ميكانيا ..وأشرف نعيم مشرف أمن أرزل من أرزل جهاز أمن...وعم محمد مدير أمن خطير، عم كامل، نحات عدى الخمسين ولا أجدعها شاب في العشرين. نبيل عريان الاتش آر شئون عاملين يدير ملايين، ووائل كمال، جهبذ الوثائق والمستندات. مهندس مجدي أنيس، مشروع مدير كبير، ومهندس أحمد أشرف، هو اللى بيشغل العفريت، مهندس مينا فخري عملاق في المدني.

المهندسة إنجي، من الفجرية بتكون كتف بكتف مع الرجال، فارس لفارس في الموقع، في ميدان العمل ، والشغل للجدعان، راس براس، وتحدي الانجاز هو الفيصل، آي نعم بنت بـ 100 راجل ..شغالة في قلب المواقع. ...وكل هؤلاء الفرامن والاسطوات والمشرفين، والصنايعية والعمال، ..والاداريين، معظمهم، ليسانسات وبكالوريوسات، من آداب لزراعة، لألسن، أيوا ألسن زي طه سعيد ، ألسُن انجليزي واختار السيفتي، بيكسب خبرة وبيذاكر عينه على مجال عال، محتكره الخواجات حتى الآن..

مصر لديها ثروة ضخمة وممتازة ..مصر ممكن تبني مثل ما تبنيه حاليا عشرات ومئات المرات..من واقع تجربتي منذ سنتين في العمل وسطهم ومعهم، وكانت تجربة كسب الرزق بعد تدهور الأحوال الصحفية، ولم تكن مغامرة صحفي ، الناس دول هم أول وأهم وأكبر ثروة في مصر، بغض النظر عن بعض المضايقات والغلاسات، ناولهم شغل وهم هياكلوه أكل، وخد عمارات وفنادق ومحطات كهرباء ومواقع بترول وغاز ومستشفيات، اديهم خرايط ورسومات هينفذوا، اطلب تصميمات هيصمموا. محتاجين أساتذة تخطيط استراتيجي، وخبراء في اقتصاد الدولة، الطاقة البشرية مهولة مهولة .

عبدالعزيز صبره