البيت العنيف.. خرابة...همسة صباح..يقدمها الدكتور:  فتوح منصور

ياريت متزعقش لعيالك:

ياريت متربيش عيالك على الزعيق وترجع تشتكي إن قلبهم حجر عليك.

متربيش عيالك على الزعيق وترجع تستغرب هما ليه بيكدبوا كتير

متربيش عيالك على الزعيق وترجع تستغرب هما ليه كارهين البيت.

متربيش عيالك على الزعيق وترجع تشتكي إنهم مش بيسمعوا نصيحتك

متربيش عيالك على الزعيق وترجع تتفاجيء إنهم متعثرين دراسياً.

متربيش عيالك على الزعيق وتستغرب اوي هما ليه تركيزهم ضعيف.

متربيش عيالك على الزعيق وتتصدم اوى لما تكتشف إن لهم حياة كاملة برا البيت انت متعرفش عنها حاجة.

متربيش عيالك على الزعيق وتزعل لما بنتك ترجع لك مطلقة وهى وجوزها اللي اتربى عالزعيق مقطعين بعض.

البيت العنيف خرابة

البيت العنيف مقبرة التحضر

البيت العنيف قبر التفاهم

البيت العنيف بينتج ناس ضعيفة ومهزوزة

اه فيه مواقف محددة يجب إنك تراقب ولدك عشان تربيه على شيء أو ترسم له خط أحمر، بس مش بالزعيق.

اللى أنت اتربيت عليه مش حجة إنك تربي عليه عيالك، لأنك عاوز عيالك أحسن منك.

أنت مش مجبر تخلف، بس لو خلفت أنت مجبر تربي.وأدعو الله أن يحفظ اولادنا ويهديهم ويجبر خاطرهم..

وأسعد الله أيامكم وصبحكم الله بكل خير