قالوا عن العيد بكل المعانى
قالوا بلالين ، ونجيب دچيه
و نشغل أغانى
و نحتفل
قالوا عيديه ، جلبيه مكويه
سفريه لبلطيم او اسكندريه
قالوا اللحمه وصلاة العيد و الزحمه
واللى قالوا البهجه و النهجه
اللى فى صوتك من الفرحه
لما تشوف ناس بعيده
بقالها فترة
قالوا حلويات ، مهلبيه ، كاستر
و المكسرات
قالوا تبادل الزيارات
قالوا طقم العيد و اللبس الجديد
اختلفت المعانى عند كل الناس
لكن فى النهاية
المقياس
إنه عيد
قولت العيد....أمى
وجودها يطمنى
نعمة من ربى
وجودها قادر يُزيل
أى تعب من قلبى
يوم ٢١ من مارس
بنحتفل بفارس
بالتاء المربوطه
بنحتفل بروح مظبوطه
ع المحبة
وألله أنا أمى دى
ست الأحبه
وستى وست الدنيا
وتاجى وتاج راسى
بيقاسى و تخبى
وتعبى جواها
مرساها
مش راسى على بر
وبتعافر لكن الزمن كافر
مراعاش حملها
و بالرغم من دا كله
مهانش عليها
تحكى لولدها
قالوا الحمل يا ست الكل
تقيل
قالت بإذن الله
قدَّها
دعوتها شمس
تمحى أى عتمة جواها
العطاء عندها هوايه
والحنان فطره
الدنيا كلها متساويش
قطره من دموعها
ضلوعها حصن
حامى لسكانه بروحه
يداوى جروحه
ويخبى دموعه
مالك يا أمى
دا دموع فرحتى بيكم
ربى حاميكم قدامى
ليه ى أمى بتدارى؟!
وأنا عارف انك بتدارى
معدتش صغير ى غاليه
تخبى عليا و اصدق
شعورى بيكى
مبدأ
مش بإيدى
أمى دعوه ليا فى صلاة الفجر
أمى أصلا الفجر
اللى بتنور الدنيا
تدعى عليا
وأنا عاصيه ليها
فى ساعة زعل وتستغفر
وتصلى
ومن تانى تدعيلى
كمان يا غاليه
دينى فيا بعطياكى
حماكى ربى
تسلم اللى تربى
زيك
و يسلملى قلبك
هاتى شويه من حملك
ما هو حرام تعبك
وكل الراحه ليا
أنا زيك يا نور عنيا
قويه
فمتقلقيش عليا
أمى جنه
أمى حنه
بتدى بس الفرحه
امى طرحه لفستانى
تزينى
لو كل العالم دانى
عمرها ما تدينى
أنا أمى ست أصيله
لما أبوت ما
لمت علينا
وقالت ولادى
قايمه بدور
زياده على دورها
ياما قالولها
نفسك
قالت ازاى ابيع لحمى؟!
نست ان فيها جمال الكون
وقالت شقايا يهون
وجمالى مش مهم
وإلا مستاهلس أكون أم
عيد واحد مش كفايه
ولا ألف عيد يكون كافى
لحم كتافى ، نجاحى
فلاحى
كل خطوه لما كنت بَحْبِى
حتى لسه قبل ما أحكى
وأكتب عنها
واقفه جنبى
ست قلبى
وست الناس
اوعى تصدق مبدأ
إن فى ناس فى زعلك
هتلاقيها معاك
فى زعلك مش هتلاقى
غير أمك هى اللى شايلاك
هى أساس جمهورك
دعاها نورط
أوعى يخونم
فى يوم زعلها منك
او يصورلك
إنك تهون
اوعى تخون
ثقتها فيك
وأوعى تفكر
إن رضاها عليك فلوس
رضاها بس من إنك تبوس
راسها
اجعل راحتك مداسها
لأجل راحتها
ماهى شايله شليتها
من زمان
وساكته
جه الدور عليك
تشيل شويه
زودوا أعيادها
خلوه مع كل فصل فى السنه
مع كل بداية كل فصل جديد
أعملولها عيد
قليل عليها مره
الأم دُرَّه
ودهب و ماس
ألماز
تيجان فى راسنا
الجنه تحتها
والجنه حبها
ومين فى قلبها؟!
ومين فى قلبى زيها ؟!
اهديكى عمرى ؟!
انتِ أغلى
اهديكى قلبى ؟!
أنتِ أحلى
اهديكى طيبة قلبى ؟!
لكن ازاى
و طيبة قلبى من طيبة قلبك
وطيبتى جنب طيبتك
والله ما تسوى
قولتلها
أسف ى أمى
مش هقدرش أجيب هديه
لإن معاييش فلوس
لاقيتها قامت
و على راسى بتبوس
وبتقولى خُد دول
علشان تخرج مع أصحابك
يا حرم بابك و كعبتك مطلبها
يارب نولهالها
واكتبلها زيارة رسولك
لو كل الخلق دعولك
صدقنى
هى دعاها نورك
سامحينى ى أمى
لو زعلتك فى يوم
بعتذرلك
وأكيد هغلط تانى
و أكيد هتسامحينى
حبك يا أمى
دينى
وأنا مؤمن
و مش عاصى
ومهما أقول بحبك
مش كفايه
لكن بردو هقولهالك
بحبك يا تاج تاج راسى
نورهان خالد
كلية الألسن – جامعة كفرالشيخ
.jpeg)
