عيدك سعيد.. بقلم الشاعر كامل إبراهيم..
مبقتش احبك ب القوى
وبدأت احس بأن حبك
حبه حبه بينطوى
أصلك " بقيتى طيبه
وانا اللى مش مفهوم قوى
وانك ملاحظه
انى بقيت بتقل كتير
وانتى اللى دايما تسألى
مش انتى برضه بتسألى؟
يمكن تكون المسأله
اتحلت غلط
وحساب قديم
وانتى اللى جيتى تخلصيه
ممكن تكونى
عايزه تمشى ف سكتين
ومجاش هواكى ف سكتى
واللا اقولك أسكتى
اصل العتاب وياك
. اكبر مضيعه..
وانا زى ما انتى كنت عايزه
بقيت بعيد
عيدك سعيد..!
*** رئيس نادى أدب كفر الشيخ
