أدعياء 25 يناير.. كلمات صبري بهوت
....
ريحة الفطيرة استوت
والكل هيدوب في هواكي
وانتي حالتك مستفذة
وباين له مش فارق معاكي
..
كله حبك كله عايزك
كل طايفة مربطة لك
اللي بيسيّل لعابه
واللي بيجوع كلابه
واللي بيدلع عبيده
واانتي سته وست سيده
لو كل واحد مد ايده
تبقي رحتي في المهالك
..
.. يا حبيبتي خلي بالك
ان قالولك دا يميني
يبقي عايزك من يمينك
وان قالوا لك دا يساري
يبقي عايزك من شمالك
اما اللي واخده الشوق
وجاي لك من وراكي
يبقي هو الاشتراكي
..
اما اللي نص كلامه فاضي
وافتراضي
اللي مش هارف بتوعه من بتوعي
هو ده يبقي الشيوعي
..
..
غير كده في رأسمالي
ويقولوا له لبريالي
متتخضيش قوي لما تشوفيهم
ماهو كله رقص آلي
..
.. ومش هوصيكي علي بتوع النضالي
اللي صوتهم في العلالي
دول لا ممكن تفرزيهم
أسل دول فيهم وفيهم
لو قدرتي تجنبيهم
ابقي خليهم ف بالك
والّا خليهم ف بالي
...
اما اللي جاي لك دقنه بيضة
او عريضة
أو حتي لابس عمة خضرة
ومخبي ف جيوبه الفياجرة
دا بقي من كل ناحية
وانتي نايمة وانتي صاحية
المهم الفجر يدن
والديوك تهتف: بعودة
اي ليلة طويلة سودة
تبقي عنده برتقالي