السعيد عبد العاطي مبارك الفايد - مصر
*******************
تغريدة الشعر العربي
((( حبنا قامت صلاته ٠٠ !! )))
الشاعرة و الناقدة د٠ رشا الفوال - ١٩٧٧ م ٠
سبقت الشمس جيت عندك
مابين الغفوة والصحيان
نخيلك ليه جريد مفرود
نغم مشدود
بيطرح فيا كُل آدان
دُعا وتواشيح
بتبقى صريح هِنا فـ حضنى
وسنة بسنة بتاخدنى
شروق دافى
وترمى الشوق على كتافى
حنين وآهات
سابقنى والسما صافية
عيونى عليك ماهيش كافية
ولا ضم الإيدين كافى
يعيد العُمر م الأول
بلهفة وشوق
تعالى ودوق
طريق الجنة فوق كفى
وصفى القلب م الأحزان
وفوق صدرى هِنا غفى
وتبقى الوردة فـ كتابى
حجابى فـ وقت شدة وضيق
وبابى لو طريقى يضيق
لعالم تانى م الملكوت
تفوت الليلة ويفوتوا
زحام وضباب
ونبدأ تانى نتمنى
ونستنى دفا الأحباب
ونبدأ تانى نتحنى
بنيل خلاب
مالوش فى الدُنيا دى غيرنا
دا ربك سبب الأسباب ٠
( قصيدة : نغم مشدود )
٠٠٠٠٠٠٠
نقدم هذه التغريدة بمناسبة حصول الشاعرة و الناقدة رشا الفوال على درجة الدكتوراة
في قسم علم النفس كلية الآداب جامعة المنصورة عن شعر العامية دراسة نفسية مع مرتبة الشرف الأولى ٠
ولها دراسات في النقد الأدبي و الشعر العامي ٠
ولا يسعنا هنا إلا أن نزف لها أخلص التهاني وأسمى آيات السعادة التبريكات حيث نالت دراسة القصيدة العامية من خلال التشريح والتحليل النفسي لحالة الإبداع الفني في جماليات التذوق للنص والمقومات الفنية لخصائصه في ثنائية الدلالة و البناء في رصد زوايا تتجلى فيها الروح هكذا ٠٠٠
و شاعرتنا لها بصمات في الساحة الأدبية ولها تفاعلها مع القصيدة العامية ، كما إنها مهتمة بشكل كبير بنشر الثقافة والوعى بين الأطفال والشباب لذلك أنشأت أول نادي أدب مدرسي في مدرسة الإلكترونية الثانوية بنات بالمنصورة، وحاليًا تمارس ذلك الدور عبر نادي أدب قصر ثقافة الطفل في المنصورة، ونادي أدب التربية والتعليم بقسم الموهوبين والتعلم الذكي من خلال برنامج "كل يوم موهوب".
أليست هى القائلة في قصيدتها ( لما بصيت للسما ) ومنها هذا المقطع الذي تحصد فيه لحظات الصفاء في مشهد بديع مع صيرورة الحياة في تجليات إيمانية وربقة صوفية متعددة الرؤى والمواجد في روح المكاشفة :
أنا شُفت فعلًا ربنا لحظة لُقاك
وعرفت إنُه حَس ضعفى
لما بصيت للسما
القصة كانت مُلهمة
دق الطبول كان صوته أعلى
من حروفى لو تفكر ترفضك
الأرض دِى كانت دليل على إننا
هانموت هِنا / حاضنين فى بعض
الأرض ناشفة تحت ضهرى /
بس راشفة منى خوفى والقلق
سيب الورق
والسبحة سيبها حبة حبة تنفرط /
مااحناش غلط
أنا شُفت فعلًا ربنا لما الإيدين اتجمعوا
ع العشق والتهليل بشوق
حبة نشوق ياخدوا الهوا للروح معاك
لحظة لُقاك
أجمل وأغلى من تراتيل البشر ٠
* نشأتها :
=======
وُلدت الشاعرة و الناقدة د٠ رشا محمد محمود الفوال في مدينة المنصورة في 23سبتمبر1977م ٠
حيث عملت باحثة دكتوراة بقسم علم النفس كلية الآداب جامعة المنصورة ٠
أضف إلى وظيفتها معلم أول أ (أخصائي نفسي ) بالتربية والتعليم ٠
كما إنها كاتبة وناقدة و عضو اتحاد كُتاب مصر مشرف أدبي على نادي أدب الطفل بقصر ثقافة الطفل بالمنصورة ٠
* من إصداراتها :
---------------------
1_ ديوان "حبنا قامت صلاته " بالعامية المصرية عن سلسلة أدب الجماهير عام 2011م
2_ ديوان "قبل ذهابي" بالفصحى عن سلسلة إبداع الحرية عام 2013م
3_ ديوان "ألف حيلة وحيلة" بالعامية المصرية عن دار ليان للنشر والتوزيع عام 2016م
4_ ديوان "عرض مُضحك" بالعامية المصرية عن سلسلة الفائزون بالهيئة العامة لقصور الثقافة عام 2017م
5_ ديوان "ياللا هانرسم" للأطفال عن المركز القومي لثقافة الطفل عام 2017م
6_ ديوان"موت الوجع": عن الوطن والناس، عن دار الإسلام للطباعة والنشر عام 2020م
_ قدمت العديد من الدراسات النقدية من المنظور النفسي
_ الجوائز:
1_ مركز أول عامية في مسابقة إقليم شرق الدلتا الثقافي عام 2012م
2_ مركز أول عامية فى المسابقة الأدبية المركزية للهيئة العامة لقصور الثقافة عام 2017م بديوان " عرض مُضحك " ٠
* مختارات من شعرها :
===============
تقول شاعرتنا د٠ رشا الفوال في قصيدتها المطولة بعنوان ( الفل وعواطف ) والتي تسترجع فيها ذكريات جميلة في تلقائية وتصور وتجسد لنا معاني الحياة التي يهرب إليها الإنسان من تلك الصراعات و المتغيرات لتعيش في ربقة ونزعة صوفية حالة إشراق مع النفس في مكاشف :
فى البدء سِتِى تقول:
الناس بلا مقامات
كالزرع من غير جدر)
يا صاحبة الكرامات
يا زارعة صبارك ومحوَّطاه بالسِدر
ومقسِّمة المنابات نظرات رضا ع الكُل
(الخوف عسير جدًا من يوم ما سبتينا
وسابتنا ريحة الفل)
فى العتمة سِتِى تقيد من ضلعها الأنوار
وبمنطق الآمنين
مزامير داوود ع الصبح تفتش لنا الأسرار
وتقول كلامها الزين:
(نُص اللى حبونا مكانوش صحيح صادقين
كُل اللى حبونا اتداروا فى الأزمات)
يا صاحبة الكرامات
يا شايلة رمل وطوب
وفــ توبك الحكايات هِىَّ اللى باقيالى
مين التفت للفرح وانا بنت ستاشر؟
مين اللى رش الملح ورقانى ودوانى؟
مين اللى يوم عوضى بَخَّر وعدَّانى؟
مين اللى هش الوهم يوم الخبيز والدبح؟
مين اللى شاف فنجان بعيون حبيب
ما تخيب؟
(جيب الدفا فاضى ماشايلش غير أنات)
يا صاحبة الكرامات
من إمتى جالك نوم وانا بره أحضانك؟
يا سِتِى فــ غيابك أصبحنا كومة قش
محشوش تاريخنا حَشّ
نتلاقَى/ نتبعتر
زى الخلا فى الريح من رعبنا نرجف
(مكانتش سِتِى تحيد عن حقها ساعة)
تغضب كأن الصبر من نن عين الجود
تعتب كأن القهر زايل ومش هيعود
تنصب حيطان القبر وتمهده للدود
مشدودة فوق ضهرها أجمل معانى
يا خال
وأصيلة كان مهرها حزمة محبة وشال
(سِتِى مليحة الحى
مرايتها متزغللش
صافية كصفحة نيل
ملايتها مبتشغلش إلا اللى طبعه أصيل)
ويقولوا عاش «أحمد»
سبحانه مَن أوجد من صبرها هيبته
سبحانه سبحانه
ويقولوا كان «أحمد» زى الرواحل فات
شايب من الأحوال
زى النبى «دانيال»
أو «نوح» فى وسط اليم
تضوى فــ عينيه لمعات
يا صاحبة الكرامات
ومفسرة المفاضيح
لا تآمنى ليهم يوم ولا تخطرى ريحهم
وان شفتى حالهم شين
كات دعوتك فى الحال:
(يا رافع الأهوال وقت الردى والنزغ ومنجى خُدامك
يا سيدى رَيّحهم وامنحهم الأبدال)
سِتى اللى كات بحالات
تنشد فى عز اليأس
والبؤس والشدة
تعند فـــ عز الفيض
وتقول: منيش رَدَّة على حد قلبه خفيف
سِتى ام رمش عفيف
كانت كما الأوتاد.. لا تستجيب للحزن
ولا تسعى للغايبين
(كانت تقول الناس مخلوقة من طبعين
طبع المريد يلزم كالضل لحبيبه
طبع الشريد تحرم سيرته وتعذيبه)
بتجيبى صبر منين ع الظلم والأوجاع
بتجيبى صبر منين على ضيقة الأتباع
دقنا المرار والذل/ أصبحنا كومة قش
