حوار مع عانس
فتاة مقهورة : ظُلم المجتمع ملأ قلبي حقداً وغلاً
بكل آلام الإنسانية، وأوجاع البشرية، فتحت قبها المذبوح وفاضت منه الشكوى، في حوار إنساني - امتد لشهور كانت كلما سمح لها حِملُها الثقيل أن تتكلم تبوح ببعض آلامها ، وسيظهر ذلك من مجرى الحوار، كتكرار السؤال وكان بين كل مرة ومرة وقت يمر ربما ساعات وربما أيام، وربما تجاهلت السؤال لتستمر في البوح ..- جاهدتها كثيراً حتى تكلمت وأطلقت من الإحساس بالظلم ألسنة لهب، حرقات وزفرات ، عبَرات مؤلمة ومحزنة ومؤسفة.
عرت أمراض المجتمع ونظرات متسلطة من الرجل للمرأة وللفتاة المظلومة بلا ذنب منها، عرت تسلُط الرجل على الفتاة المسكينة وأخطر ما كشفت عنه هو تسلُط المرأة على أختها المرأة
كشفت المغالطات الاجتماعية والاقتصادية ..والدينية، كشفت الأوضاع المغلوطة والمفاهيم المعكوسة التي أصبحت واقع وعادات سيئة،
في حوار كنت غالبا فيه أستمع لإنسانة أرادت أن تزيح عنها بعضاً من همومها وتُطلق صرخة...
سَمِعها : عبدالعزيز صبره
أراكي تنتقدين عزوف الرجال عن الزواج من المطلقة والأرملة ؟
..وأيه في اللي قولته غلط ...هو صح إن شاب عنده ٣٥ سنة يترك البنت اللي من سنه تعنس أو ياخدها راجل مطلق وألا عايز واحدة تربيله عياله
ويروح يختار عِيلة ١٨ سنة وبعد الجواز يكتشف إنه خد أكبر خاذوق وإنه جاب طفلة البيت عايزة تدلع وتتفسح وتاكل شوكلاتة وكل شوية عند أمها
وبتتكسف كل ماييجي جمبها وعايزة شهور وأيام على مايعرفها ويعلمها أيه اللي بيبسطه..
..وبعدين يدي لنفسه المبرر للخيانة
..واللي مراته ماتت ومعاه عيال وراجل كبير سايب المطلقة والأرملة ومصمم ياخد بنت بنوت
أنا مش معترض بالعكس أنا موافقك جدا؟
..وبيلاقوا مبررات من الدين.. ويقول لك الرسول صلى الله عليه وسلم اتجوز اللي أصغر من بناته..ويتناسوا أن الرسول صلى الله عليه وسلم تزوج المطلقة والأرملة واللي أكبر منه
ومش فاهمين إن تفسيرهم للأمور بالصورة دي بيسيئ للنبي صلى الله عليه وسلم
..النبي كان رسول من الله كل تصرفاته وكلامه عن وحي من ربنا مش بمزاجه
والرسول مش زي بني الانسان ..الرسول كان قادر يعدل بينهم..واتجوزهم عشان يعلم البشرية حاجة....إن وقت الحروب لما يموت عن إمرأة زوجها وسايبلها أيتام صغار وهي متقدرش تعيشهم ولا تعيش نفسها يبقى واجب على رجال البلد يتسابقوا عشان يتجوزوها عشان يربوا الأيتام.. هل ده بيحصل دلوقت؟
..بالعكس ..أي راجل بيختار مطلقة بيختارها لسببين:
أولاَ: لإنها مش هتطلب حاجة هي عايزة تعيش وبس..ثانياً: عشان تدلعه وتمتعه وتنسيه نكد مراته الأولى..
وبيكون طلبه واضح ميصرفش على عيالها وملوش دعوة بيهم ومتخلفش منه
ولما الرسول صلى الله عليه وسلم اتجوز المطلقة كان برضه عشان يعلمنا حاجة إن المطلقة بعد ماجربت الجواز مينفعش تعيش من غير راجل ولإنها خرجت من بيت أهلها لما اتجوزت وريحتهم من همها مش هينفع ترجع تاني، فطبيعي لازم تكون في عصمة راجل يحميها ويستر عليها.. الستر هنا مش بمعنى ستر الفضيحة أو العار ..ولكن يستر عليها يعني يضلل عليها..ويحتويها...ويحميها من غدر الناس والزمن..هل ده بيحصل دلوقت؟
زي ماقولت لك اللي بيختار مطلقة بيختارها عشان بتقبل بأقل من غيرها عادي تترمي في أوضة وصالة وحمام من داخل مطبخ إيجار جديد بعفش قديم من غير شبكة ولا حتى دبلة ومن غير فرح وفستان..موفرة يعني
..نظرة دونية للمرأة..أَصَّلَها فينا الفكر الوهابي..ومن هنا تخرج العلل والأمراض النفسية من المرأة..وتتحول لأفعى سامة
..لو اتجوزت حتى لو جوزها أقرع وبكرش وبيزروط البيت وبيقعد اللباس وياكل ويتقرع.. حباه وعايزاه ومكلبشة فيه وأي ست تكلمه كلمة عالفيس أو في الشغل أو في الشارع أو أي مكان تبقى هتاكلها بسنانها
وكاتبه اسمها عالفيس مرات فلان الفلاني..اللي هو الجدع ده يخصني
واللي هتقرب هشَّرحها
..وزي المطلقة ماتضطر تمشي في الطريق السهل أفضل ماتتجوز واحد يعاملها كجارية ببلاش....لا أتصور وأنزل صوري عالانستا وأعمل فيديوهات وأنزلها عالتيك توك وأكسب كتير..أو تشتغل رقاصة أو في الدعارة....على الأقل تكون حرة نفسها وبتكسب كويس ومحدش يقول لها رايحة فين وأتأخرتي ليه ..وعايشة بمزاجها حضرتك مستوعب فكرة إن راجل يتجوز ست من غير مهر وبغرض المتعة فقط؟ ده مش جواز..دي دعارة برخصة..سواء إسمها عقد عرفي أو قسيمة مأذون..ده مش زواج.
سامعك؟
وفوق كده الحقد والغِل اللي بيتسبب فيه المجتمع وبيخلقه فينا..إن لو بنت حظها كان كويس وصدفة عرفتها على حد مستوى واتجوزته تقعد حاطة رجل على رجل ومتنكة ورافعة مناخيرها وتختار عروسة أخوها..وكل مايختار واحدة على مزاجه تقف له فيها زي العقلة في الزور
وتقول له: لأ..إحنا مناسبش الأشكال دي..دي مش من مستوانا..دي مش شبهنا..وهي أصلا جدها كان مبيض نحاس أو مزارع في التراحيل..من هنا بتتربى الضغائن والكراهية.. لغاية لماأصبح أغلبيتنا مرضى نفسين بفعل المجتمع ..
لو عايز تبقى صحفي ناجح ويمكن إعلامي كمان..عيش جوة المجتمع واتعجن جواه..إعرف الناس بتفكر إزاي واتحاور معاهم..هتكتشف حاجات يشيب لها الولدان
حضرتك أنا بأتحاور معاكي أهو وبسمع؟
إسأل أسئلة غير متوقعة وفاجأهم بمواضيع مثيرة للجدل..هتكتشف مستوى من الانحطاط في الفكر والثقافة وجهل مدقع ودونية تصل للحضيض..ومهازل فكرية..كوميديا سوداء شوف الناس بتقييم بعض إزاي حسب شهاداتهم وشكلهم وبيتهم وشارعهم وطريقة كلامهم معاكي..كفاية كده
على فكرة أنا مش بعيد عن الناس..بس يمكن مشاكلي وظروفي طاحناني؟
ركز في شغلك ومتعشش حياتك يوم بيوم وخلاص..سيب سيرة طيبة لأولادك..اشتغل على نفسك وإعمل شغل تتعرف بيه ويبقالك إسم ..ربك يسهلها إدعي لي ..
يضايقك لو كتبت حاجة عن الكلام دا واستخدمت كلمة عانس؟
استخدمها من منطلق إن ده المعنى الدارج عند المجتمع.
تمام..هل شايفة طاقة نور أو تطور في المستقبل؟
للأسف لا..المجتمع مع الوقت بيسقط أكتر ..والعالم داخل على جائحة "كورونا" هتاكل الأخضر واليابس..والأذكياء مستحيل يتجوزوا أو يخلفوا
لا مش معاكي في التشاؤم ..حتى لو المجتمع بيسقط فأكيد السقوط نفسه له نهاية وهتتغير المفاهيم والمعتقدات؟
سياسة البقاء هي التي ستسود.. مبدأ لو جالك الطوفان حط إبنك تحت رجليك.. مبدأ أنا ومن بعدي الطوفان..الأنانية وتفضيل الذات..فاهم؟ .. ثقافه الوباء؟..اللي هو كلنا بنموت..واللقاح قليل مش هيكفينا..وتجار اللقاح بيرمولنا كام علبة عشان غرضهم يموت مننا أكبر قدر ممكن..
ويفضل ويعيش اللي هما بس عاوزينه يعيش.. المبدأ نفسه هيتأصل فينا، وهنطبقه في كل حياتنا..أفضل نفسي عن الآخرين..
..لو جالي خير معرفش حد بيه ومشاركش حد فيه ومدلش حد على طريقه..مبدأ أعيش يوم بيومه ماكده كده ميتين..أنبسط وأتمتع وأعمل ما بدالي بالقرشين اللي حيلتي..منا هموت
مبدأ أتجوز أي واحدة عاجباني وأنبسط بيها ومش مهم إن كانت مناسبة ولا لا..فاهم..
بأحاول أفهم؟
الأيام الجاية هتشوف كلامي وتتأكد منه..عارف.. الصح والمنطق بيقول إن مادام الأيام الجاية صعبة ..
بس أيه رأيك لو نشرت الكلام دا كحوار معاكي وبصورك واسمك ولا تحبي لا اذكر اسمك ولا نستخدم صورك؟
..وكده كده العالم بيتخلص منا..نعيشلنا يومين..واللي في حد بيحبه يتجوزه ويفرحه وينبسطوا وملعون أبو الناس والمجتمع واعتباراته اللي ليل نهار شغل ومش راحم نفسه وبقاله سنين بيأجل يسافر..يسافر وينبسط..
..اللي عمال يخلف يوقف وكفاية ..أجيال بتيجي الدنيا تتعذب واللي عمره ماعمل خير يعمل أي حاجة تشفعله ..لكن للاسف الناس ملهية..وهيفضلوا كده لحد مايلاقوا المسيح الدجال فوق راسهم..
صباح الخير ...ممكن نستكمل نقاشنا الرائع ..وهل تعلمين أن فتيات كثيرات جميلات وأغنياء وربما في وظائف ممتازة ولا يتزوجن ويُحجم الشباب عن الارتباط بهن ..زي كدا ما بنشوف ناس كتير شُطار في شغلهم لكن مالهمش حظ؟؟؟
مش هقدر افتح معاك أي نقاش دلوقت بعدين..
أوك
إنتي عاملة أيه؟
عايشة.
ذلك فضل من الله
هل تؤمني أن المظلوم في الدنيا سيعوضه الله في الآخرة؟
اه "نعم" .
أنا أعتقد أنه أكيد ..الدنيا دار ظلم والآخرة دار حق؟
إذن يحق للمظلوم في الدنيا أن يكون سعيدا وقانعا..أليس كذلك؟
إن شاء الله.
متى نتكلم؟
لما أروق.
مش هتكملي كلامك الجميل؟
هل أستطعتي التغلب على مشاعرك التي نتجت تجاه المجتمع والتي تسبب فيها المجتمع نفسه بظلمه لك؟
مبقتش أحاول أتغلب على أي مشاعر سلبية وأصلا أنا مبقاش جوايا غير المشاعر السلبية قلبي إتملى غِل وحِقد وسواد وكراهية للمجتمع كله وأوله أقرب الناس ليا
مش عارف أقولك من حقك وألا أنصحك تتغلبي على هذه المشاعر؟
انا شوفت بنات كتير أغنياء وحلوين وما اتجوزوش ؟
القصه مش جواز.. أنا تعبانة مع الناس اللي عايشة معاهم وعايزين يمشوني..
مين هم ..ويمشوكي فين ؟
وهل تقدري تمشي وتستقلي بحياتك ؟
وهل غلبتك الكراهية يوما وحاولتي تنتقمي؟
وهل فيه حل لوضعك خاصة.. وهذا الوضع عامة؟
وهل فكرتي مرة مثلا في الانتحار ؟
أو حاولتي مرة تاخدي حقك أو قدراً من السعادة أو ترضي جزء ضئيل بداخلك بأي طريقة؟
بصراحة الأسئلة كتيرة وياريت تقدري تكملي أو تستكملي البوح ..وطبعاً إنسانة بذكائك وثقافتك أكيد عارفة إني شخصيا هستفيد من الحوار معاكي ..ولكن وبصدق أنا حقيقي أتمنى الحوار دا يكون ناجح ويكشف المأساة التي تعيشها ملايين مثلك بسبب أفكار ومبادئ سيئة؟
مين هم ..ويمشوكي فين ؟
الناس اللي عايشة معاهم
وهل تقدري تمشي وتستقلي بحياتك ؟
لا مقدرش انا مبشتغلش ومعنديش استقلال مادي ولا مصدر دخل يأكلني مش يجيبلي بيت أدفع إيجاره ومصاريفه ومية وكهربا وغاز.
وهل غلبتك الكراهية يوما وحاولتي تنتقمي؟
نفسي انتقم بس معنديش الوسيلة أنا أضعف من إني أقدر انتقم
وهل فيه حل لوضعك خاصة.. وهذا الوضع عامة؟
لا مفيش أي حل لوضعي محتاج معجزة تغير مجرى حياتي والانسان اللي بأتمناه يجي ياخدني وأبدأ معاه بداية جديدة بعيد عن كل القرف ده.
وهل فكرتي مرة مثلا في الانتحار ؟
يوميا بفكر بس معنديش استعداد أخسر آخرتي كمان..وطول الوقت بطلب الموت لأن مفيش حل غيره
أو حاولتي مرة تاخدي حقك أو قدرا من السعادة أو ترضي جزء ضئيل بداخلك بأي طريقة؟
حاولت كتير وسعيت كتير بس اللي حواليا شايفين إني مليش أي حق..خلصت تحقيقك الصحفي ولا في أسئلة تانية؟
لسة كتير ..بس أنا الإنسان غالب الصحفي ..ال موجود طبعا؟
بس أنا أصلا تعبانة من كتر الكلام ومفيش حاجة هتتغير بالنسبة لي..ومش هستفيد حاجة من إرضاء فضولك الصحفي ثم أنا مش فنانة ولا مشهورة.. هتعمل معايا حوار.
هو مش فضول صحفي قدر ما هو فضول إنساني ..وعندي أمل إن الدولة تعمل مثلا معاش للفتيات كبيرات السن والمحرومات من دخل أو استقلال مالي؟ وعلى فكرة حوارك دا لو اتنشر كويس هيكون أهم حوار؟
أولا: أنا بآخد معاش التأمينات ..معاش والدي..لي فيه التلت وأمي التلتين..بس مباخدوش في أيدي ولا حتى أعرف كام..بيتصرف في البيت مبحصلش منه جنيه
ثانيا: الدولة غيرت مبدأ إنها تصرف عالشعب وبتقول محدش يقعد في بيته كله يشتغل..والسيسي من أول يوم طلبوا منه الترشح قال هتشتغلوا وهتصحوا معايا الساعة خمسة، وها شيء جيد ، ولكن أنا قدام المجتمع كله..مُذنبة..وعالة.. ولازم أشتغل ..
..حتى لو شغلتي واقفة بسبب كورونا..وحتى لو الصناعة دي باظت بعد الثورة.. وبتشتغل يوم وعشرة لا..وحتى لو فيها معاكسات وسفالة واختلاط واحتكاك.. ومرتب ضعيف لا يتعدى ال١٠٠٠ ج ..بينصرفوا مواصلات وأكل شارع.. بيدمر المناعة والقولون
وهي ايه الصنعة دي؟
بس برضه المجتمع شايف إني لازم أشتغل..في أي حاجة.. أعمل أكل وأبيعه في الإشارات والكباري.. أجيب عربية كبدة .. أعمل هاند ميد وأبيعه عالنت.. المهم مقعدش
بغض النظر إني كبرت ومش عايزة اتبهدل
ما يمنعش إنك تاخدي معاش بصفتك واحدة من مصر وحيدة ولها وضع إجتماعي يشبه وضع المطلقة والأرملة - مثلا - ولا عائل لكي..وحفظا لكرامتك؟
لا لازم اتبهدل واتمرمط عشان المجتمع يحس إنه تمام ومقصرش في حقي وأهلي ميحسوش بعجزهم وإنهم مقصروش معايا ومعلمونيش كويس و"يتفشخروا بيا"
ما يمنعش انك تاخدي معاش بصفتك واحدة من مصر وحيدة ولها وضع اجتماعي واقتصادي صعب ؟
مفيش حاجه اسمها كده قانونا..حتى المعاش الإستثنائي مليش فيه.
- أنا أقترح وآمل ذلك..بأتمناه يعني؟
البلد مفيهاش فلوس توزعها على حد..وزي ماقولتلك البلد عايز كله يشتغل حتى المعاقين.. أسموهم ذوي الهمم عشان يشتغلوا غصب عنهم..
..والإعلام عمال يلمع ويُشهِر أي واحدة بتشتغل سواق توك توك والا تروسكل..عشان يقول لك إن الحريم أبطال.. مهزلة فكرية.. ضحك عالدقون
الشغل مش عيب ولا حرام وغالبا متاعب الشغل أفضل مليون مرة من مشاكل وعذاب البطالة ؟
الست مكانها البيت..وواجب على جوزها النفقة..غصبا عنه..
..بس دعوات تحرير المرأة هي اللي وصلتنا لكده إننا نتمرمط ونتبهدل بملاليم عشان نخلي بيوتنا مش ناقصها حاجة.. هقول لك مثال بسيط.. الشرع بيقول لا البنت ولا أهلها يجيبوا قشاية في بيت الزوجية وكمان تاخد مهر متصرفش منه قرش على البيت ده..
لكن دلوقت المجتمع صاحب الفكر الأعوج المتعفن قرر أنها لازم تجيب جهاز يشرف العريس قدام أهله..والهانم ممكن تدين أهلها ده لو عندهم دم وهيجهزوها عشان يجيبوا جهاز يعبي خمسين عربية.. ويفرش عشر شقق
وفي حالات ممكن أهل العروس ميجيبوش زيي حالتي ..وقالوا لي عايزة جهاز روحي اشتغلي..
وهي تطلع روحها العمر كله وأحلى سنين عمرها تضيع في الشغل عشان الجهاز..وتحرم نفسها من كل حاجة عشان تحوش وتعيش عالحلم إن اللي هيخطبها هيعوضها..
..وفي الآخر ييجي الباشا يلقح عليها عالفيس إنها طفسة وكل اللي عايزاه عزومات وفُسح وهدايا كأنها طمعانة فيه وكأنه الوليد بن طلال..في حين كمان عالجهاز ده كله اللي يحمل قطر جايب شقة إيجار جديد وعفش بالقسط.. ومديون في جمعيات.. هي اللي مدخلاه فيها لإن فلوسه رايحة عالهلس والحشيش والدخان.. ولولاها عمره ماكان هيتجوز..وبعد الجواز يلقح برضه عالفيس إنها اصطادته ..وإنه ما كانش بيفكر يتجوز..وهي اللي وقعته في شباكها..
..الست ياعزيزي غلط تشتغل
..غلط لإنها لو حطت مرتبها مرة في البيت كمساعدة بيتحول لواجب عليها ولازم تدفع..
..غلط لإن الأخ بيقبل على نفسه أخته تتأخر برة وتشتغل يوم الجمعة وتنزل من البيت وهو مش عارف رايحة تشتغل وألا تقابل واحد .. قابل عليها تنزل في عز السقعة والبرد من الفجر.. وفي الصيام وفي عز الحر والخماسين اللي تكتم النفس .. من غير ذرة رحمة في قلبه..
..قابل تركب مواصلات والـ...... يتحرشوا بيها.. وتلقط كورونا من الاحتكاكات والزحمة
قابل عليها واحد بارد يرخم عليها في الشعل وواحدة شمال تحطها في دماغها وتقرفها
..ما كانت الناس راضية بقليلها وعايشين في بيوت بيجيبوا فيها الأساسيات بس و كانوا بيعرفوا يفرحوا..وكانوا عاملين لحياتهم نظام ..وبيخرجوا ويشموا هوا
..دلوقت الحياة بقت شغل وبس..
..زمان كان الراجل بيروح بدري يقعد مع ولاده ويربيهم مع أمهم..ويكون فيه نقاش وتفاهم.. دلوقت لو رجع بدري بيطلع ياكل وينزل القهوة...والهانم عشان تقضي وقتها تفضل تشتغل طول النهار
..شغل المرأه قتل النخوة في قلوب الرجال..بقوا يسمحوا حريمهم يلبسوا فوق الركبة ويعروا شعرهم ويلبسوا بنطلونات ويحطوا ١٠ كيلو بوية عشان الشغل عايز كده.. عشان منظرنا قدام الناس..عشان الستات والبنات بتبص لبعضها..وده المبدأ اللي عايش بيه المجتمع..
..هو أنا بكلم نفسي
لا معاكي بس سايبك تسترسلي ..وبغض النظر عن الاختلاف أو الاتفاق حول بعض ما قولتيه ..مفيش شك إن مشاكل كتير بالنسبة لك تنتظر الزواج ..ال متأخر بدون ذنب منك؟
ادعيلي.
يارب
