- فيه شاب إتولد فى أسرة فقيرة من ضواحى الضواحى بمدينة بيلا

- إتولد فى بيئة تطلعه بالمستريح كده عاطل أو حشاش أو بودرجى

- أبوه سواق توك توك وبيصرف على أسرته بالعافية

- الشاب عافر وكافح ضد كل ده وبقي لعيب ورياضي وبطل دولى !!

- كان بيشحت الجزمة من زمايله عشان يلعب الرياضة إللي هو شاطر فيها

- كسب بطولة وإتنين وعشرة لحد ما بقي قادر يمثل مصر فى البطولات الدولية .. ورفع إسم وعلم مصر فى بطولات كتيرة

- ومحدش عبره ولا جاب إسمه أو صورته وتاريخ معافرته وظروفه المعيشية

- ماتكتبش إسمه فى الجرايد وأد ايه الراجل عاني وشقى عشان يبقي بطل

- ماحدش إستضافه زي حمو بيكا وشاكوش وحماصة وحناكة والعمدة

= بس البلد كلها سمعت عنه وكتبت عنه لما زهق وطهق من الخرا ده وهرب

- بلد معاها الكنز ده والأبطال والإنجازات دى ومش بتتكلم عنها غير لما تهرب

- واحد بياخد 3 آلاف جنيه في الشهر .. ولما ياخد مكأفأة 18 ألف جنيه الضرايب تاخد منهم 16 ألف وإسمه بطل مصري .. ومحمد رمضان ياخد ألاف الدولارات 

القضية مش قصة "بغدودة" بس

- أنا أسمع عن دكاترة كانوا حيتان فى شغلهم .. ربنا رازقهم بموهبة فى الطب والجراحة .. دفعوا من جيوبهم عشان يتعلموا برا علي إيد اساتذة .. وحصلوا على شهادات العالم كله يعترف بيها

- ومالقوش من بلدهم غير شوية دُخلاء على المهنة بيقعدوا يشطبوا عليهم ويحولوهم للتحقيق ويخصموا لهم .. لحد ما هجوا من البلد وكلهم دلوقت فى إنجلترا والمانيا والخليج

- ومستشفياتهم دلوقت بيترحموا علي أيامهم ويقولوا لو فلان كان هنا دلوقت كان عمل كذا وكان علم كذا وكان ظبط كذا

- البلد دي ربنا رازقها بناس عباقرة فى كل المجالات .. ولو رفعنا إيدينا عنهم وشجعناهم هنبقي أحسن بلد فى الدنيا

- ونرجع نسأل هي بايظة ليه .. والواد ساب المعسكر والدكاترة هربوا ليه ؟