لحظة إعلان انسحابي شعر أحمد طليس
قفلت بابي / ودخلت محرابي أنام
دموعي سيل. .كان فيه كتير م الأسئلة
وآلام كتير ومتلتلة
يمكن تحل المسألة
اللي محتاجة لجواب /وحروف عذاب
انا قلت أحلم / بس يكون الحلم / علي قد الجواب
حتي لو حرفين عتاب
الحلم رافض في الإجابة
رافض يكون / علي قد الغلابة
وانا عمري عدي مني وراح
واخد معاه كل ارتياح
وفايت لي قواميس م الجراح
وطلاسم من أكاتيب القدر
وسطور خيوطها م القمر
وخيال لطيف محتاج وصيف
انا ليلي م العتمة استجار
والنبض غيبوبة دوار
والضلمة في وسط النهار
وانا نبضي محتاج للغيار
وكتابي مرمي علي الرصيف
والهمس متحجر ع اللسان
بيقول لي فاكر ايه زمان
قلبك كان / زي طير فوق السحاب
طب ليه وقع لحظة انجرح
حسيته جواك اندبح وصبح قتيل
دمه وسايل ع الورق
والشوق معاه وبيتحرق
إحساس وجواك اتخنق
والحلم وياه اتشنق طب باقي إيه
تبكي عليه / ماتروح تنام
يمكن تلاقي ف المنام
طيف يزورك كل ليلة
لما تفوق تشتاق إليه !
** من ديوان / اغفر زلاتي
