أنا هموت واللي بنحبهم واللي بنكرههم هيموتوا.. اللي بيحبونا واللي بيكرهونا هيموتوا.. للأسف كبرنا وبقينا واخدين بالنا من ده ومصدقينه كويس جداً.
هنموت.. أمتى؟ فى علم الغيب بس أنا عن نفسي بحس كتير إن الموضوع قريب قوي أنا إحتملاتي بتنزيد مع كل مرة بخرج من البيت كل مرة بتنزل للشارع بتكون مهدد بالحالات الفردية، بلطجي شكلك مش عاجبة ، السواقين المبرشمين، والأمراض المستوطنة، والإحتباس الحراري ده غير الأكل المسرطن والمياه الملوثة والهواء المحمل بأول أكسيد الكربون الجميل والأخبار اللي ممكن تسبب جلطة أو سكتة دماغية الموت في كل حتة متقلقش.
طريقة التعامل مع فكرة الموت وأنا صغير كانت بتزيد للغرابة يعني مثلاً أهل والدتي بيزعلوا جدا على الميت زعل بيمتد لسنين وأسود مبيتقلعش أهل الحاج كانوا بيضحكوا وبيهزروا في العزا وياكلوا ويحبسوا بشاي المفارقة في التعامل دي زودت من غموض الموت عندي
يمكن بس اللي مقلق منه الطريقة يعني أتمنى تكون طريقة سهلة يعني متكنش حادثة ورقبتي تتكسر والعربية تتعجن بيا وأنا أفضل شايف كل ده وحاسس بيه ومش عارف أتحرك وأخدلي شوية وقت في موت بطيء ولا أدخل مستشفى مغمى عليا ويحطوني على أجهزة كام شهر وأموت في الآخر بعد ما العيلة تفلس من كمية المصاريف عايز أموت كده في ثانية وطبعا يعني أتمنى جدًا لو أنا نايم ده بالنسبالي هيكون أتعمل معايا الواجب.
أكتر حاجتين بيخلوا الناس تحلو الحب الحقيقي والموت.
مثلاً لما نموت أغلب الناس هيشوفونا حلوين وهينسوا أي حاجة وحشة عملناها وده شيئ لطيف لكن بالنسبالي بعد ما أموت نفسي في كذا حاجة وخصوصُا لو الموضوع طلع قريب فعلًا فدي فرصة مناسبة لكتابة وصاياي العشر قبل ما أنسي.
* بابا وماما وأخواتي دول أكتر ناس بحبهم في حياتي شكرًا ليكم إنكم صدقتوني في النهاية وإنكم سيبتوني ألعب محاولتي في الدنيا زي ما أنا عايز آسف إني مش هكون جمبكم في وقت ممكن تكونوا عايزني فيه معاكم أقفلوا باب أوضتي هتحسوا إني لسه موجود، وإني نزلت ولسه مرجعتش.
* صحابي وكل القريبين مني متخلوش موتي يأثر عليكو يعني متخدوش أجازة علشان الدفنة ومتعطلوش نفسكم في العزا روحوا وأتبسطوا زي أي يوم عادي كده كده لو أتضايقتم هتضايقوا أسبوع شهر سنة وبعدين هيختفي كده كده ليه تضييع الوقت أنجزوا الزعل ده ملوش قيمة غير الوقت اللي بيروح فيه.
* لو كنت أتجوزت فأنا بحب أشكر زوجتي إنها استحملت كائن زيي لو كنت خلفت ؟! متزعلوش يا ولادي من الحركة البايخة دي أبوكو بيلعب معاكو بس مش هيظهر إلا في الآخر عيشوا بدماغكم وشيلو مسئولية إختياراتكم.
* اللي بيحبوني مفيش حاجة تستاهل إنكم تضايقوا إن واحد سبقكم على الحياة الحقيقية واللي مبيحبونيش خلاص بقى انا مشيت استغلو طاقة الكره دي في حاجة مفيدة أحسن.
* الناس اللي زعلتهم وأنا مقصدش بتأسف ليكم جدًا والناس اللي زعلتهم وأنا قاصد لو هيضايقكم لو قلت إني لسه زعلان فأنا لسه زعلان فعلاً.
* أي حد ليا حق عندي يرجعه لأهلي اة صحيح.. اللي ليه حق عندي يبقى بيستهبل.. محدش ليه عندي حاجة..
* مش لازم توزعو قرص بالعجوة فى الترب.. ممكن تجيبو فطيرة كيري إضافة سجق لأن دي أكلتي المفضلة وأفتكرولي أي موقف حلو وأضحكو.
* محدش يكتب بوست عن إني مُت.. وبالذات اللي بيكتبوا (إنا لله وإنا إليه راجعون)بس من غير اسم لأن كل اللي يقرأ البوست بيشتموا على اللي مات من غير ما يعرفوا هو مين.
* لو مُت بدري فعلًا محدش يقول كان قلبه حاسس أنا بس بحب أحط الإحتمالات طول الوقت التقنية دي ساعدتني كتير.
* ووصية عامة لكل أخواتي أستمتعوا بكل فرصة ومحاولة في الدنيا وخلي عندك يقين بالله أن الجنة هى بيتك فى الحياة الحقيقية خافوا إنكم تظلموا وتحكموا غلط على الناس وتاخدوا حقوقهم في الدنيا أكتر.. وبلاش عشان نظبط إزاي هنعيش بكرة ننسى نعيش النهارده فميجيش بكرة.
