النهاردة وأنا نايم على السرير سرحت فى مستقبلي شوية و كأننى أمام فيلم خيال علمى أمريكانى، وقلت ياة لو أعيش فى غواصة تحت البحر اعيش ملك فى أعماق البحار .. وساعتها بقى محدش هيقدر يكلمنى.. مانت عايش برنس و الحياة هتبقى (ايزى،،ايزى) لا فيروس كورونا ولا إيجار و لا مواصلات و لا كهرباء و لا مياه و لاحتى زحمة على طابور العيش و لا حاجة. و بعدين قلت أشوف ظروف الناس اللي ع الأرض.. لقيت الحال ساعتها ضيق والدنيا شدة جدآ على الناس.. أزمة كورونا العالمية بدأت تودع و ماشية، قلت كويس اهه الناس تشم نفسها شوية والحظر بدأ يتفك والمحلات التجارية هتفتح تانى، لكن فجأة الشقق أسعارها بقت ولعت، و الإيجار وصل لـ 3000 جنيه و الناس بقت لايصة و ناس بقت هايصة..، و اللى عايز يتجوز و مش عارف بعد مالدنيا بقت أسعارها نار، و كل أم مبقتش عارفة تجهز بنتها ازاى هتجيب منين ماهو اللى جى على قد اللى رايح؟.. والشباب دلوقتى بقت منقسمة الى إثنين اللى ماشى يكلم نفسه، و ماسك وردة، و يقطف و يقول: اتجوز و لا متجوزش.. اتجوز و لا متجوزش!!!.. واللى سلك طريق الشهوات والحرام وتجارة المخدرات وكل ما يغضب الله سبحانه وتعالى من أجل المال السهل..!! طبعا أنا لما شفت كده حمدت ربنا إنى فى عمق البحر . .فجأة و بدون إنذار الأكل اللى معايا خلص، و لكن دوام الحال من المحال فقد ارتفعت الأسعار فى عمق البحر أيضا، و وصلت الأسعار إلى الآفات الدولارات يعنى بالبلدى كده لا عارفين نتهنى ع الأرض و لا فى البحر. بدأت أفكر أطلع الى سطح الأرض فى عمق حوالى 1500متر بس فكرت تانى إزاى أقعد فى شقة إيجارها بالآلافات و لحمة أسعارها بالميات و كل ده ع الأرض.. مستحيل . بعد ما عيشت فى عز و نغنغة فى أعماق البحار.. كده هبهدل نفسى معايا اوى .. وفجأة امى دخلت عليا وانا عمال أقول كده، و هى تقولى مالك ياحبيبى انت اتجننت بحر إيه اللى هتروحوا وتقعد فيه؟! اقفل المروحة و نام يا ابنى!!